અનુભવોક્તિ :::

ગઈકાલે રાત્રે અંદાજે ૯.૩૦ કલાકે વોલ્વો બસમાં (બીજી રો હતી) બાજુનો મુસાફર અચાનક જ મોટા અવાજે રાડ પાડી ઉઠ્યો. ઓઓઓ મમ્મીઇઇઇઇઇઇઇઇ.... હેમાંઆંઆંમાંઆંઆં

અને બસ ડ્રાઈવર સહીત સહુ ધ્રુજી ઉઠ્યા. મારી સાવ બાજુની સીટ ઉપરનો અવાજ એટલે હું પણ ચોંકી ઉઠ્યો. અને જેવું મેં એની તરફ જોયું ત્યાં તો વધુ મોટો અવાજ...
ઓઓઓઓઓઓ મમ્મીઇઇઇઇઇઇઇઇ

અંદાજે ૩૭-૩૮ની ઉંમર, અને આવું વર્તન??

પહેલી રો માંથી બન્ને મુસાફરો પાછળ ફરીને જોવા ઉભા થયા, અને એ પણ હેએએએ અરે આ શું???? ઓઓઓઓઓઓ કરી ચુક્યા..

કારણ??

ગઈકાલ રાત્રીની જ તાજી વાત છે. હમણાં છેલ્લા ૪ દિવસથી કામના હિસાબે અમદાવાદ-વડોદરા અપડાઉન રહે છે. એક જ પીક્ચર (ઢોલ - તુસ્સાર કપુર / શર્મન જોશી વગેરે ૪ દિવસમાં ત્રણ વખત જોયું હતું અને કાલે સાંજે ચોથી વખત પાછું) એસ.ટી.ની વોલ્વોમાં જોવું ન પડે એ માટે મેં મોઢા ઉપર રૂમાલ ઢાંકી રાખેલો. અને રૂમાલ ઉડી ન જાય એટલે એ સફેદ રૂમાલ ઉપર કાળા સનગ્લાસ પહેરી રાખેલા..

અને

વડોદરા-અમદાવાદ એક્સપ્રેસ હાઈવે ઉપર પુલનું કામ ચાલુ છે, ડાઈવર્ઝન ને કારણે એક જ લેન (૧૦૦ મીટર જેટલો જ ભાગ) ઉપર સામેથી આવતા વાહનની હેડલાઈટનો પ્રકાશ મારા ચહેરા ઉપર પડ્યો અને એણે મને જોયો અને આ ચીત્કાર.....

બસ આટલી જ વાત હતી.

#આ_તો_એક_વાત

અર્થઘટનની સુઝ

અર્થઘટનની સુઝ ::::

આ પ્રસંગ મને મારા એક વડીલે જણાવ્યો હતો. એમના જ શબ્દમાં રજુ કરીશ..

મારો મિત્ર M.A.(ગુજરાતી) B.Ed. અને શહેરની પ્રતિષ્ઠિત સરકારી શાળામાં ગુજરાતીના શિક્ષક તરીકે ફરજ બજાવે. શાળામાં ઇન્સ્પેક્શન આવેલું હતું, એ સાહેબને ઇમ્પ્રેસ કરવા મિત્ર જોરદાર રીતે ભણાવતો હતો.

ક્લાસમાં કવિતા ભાવ સાથે સવિસ્તર સમજાવતો હતો. મારા દીકરાને ન મારો. મારવો હોય તો સિંહ મારો. મારા છોકરાને નહી. માં વીલાપ કરતાં આ બાબત એના પતીને સમજાવે છે. વીનવે છે.

આટલું સાંભળીને એ શીક્ષણાધીકારી કમ કવિ બેભાન અવસ્થામાં મુકાઈ ગયા. અને એ કહે કે મારી કવિતાનો આવો અર્થ નીકળી શકે એ મને આજે ખબર પડી. કારણ એ કવિતા એમની જ લખેલી હતી અને ધોરણ ૬ના અભ્યાસક્રમના ભાગરૂપે હતી.

કાવ્યની પંક્તી એવો ભાવ દર્શાવતી હતી કે એક નાના બાળકની માં ગુસ્સાવાળા કૃર બાપને સમજાવે છે કે રોજ રોજ આપના ગુસ્સાનો ભોગ આ બાળક બને છે અને એને રોજ રોજ આપનો માર પડે છે. આમ ટુકડે ટુકડે ન મારો. મારવો હોય તો સાવ જ મારી નાખો. આ રોજની પીડા એક માંથી નથી જોવાતી.

આ સાવ જ (તદ્દન મારી નાખો) ને એમણે સાવજ સિહ બનાવી નાખેલો.

#આ_તો_એક_વાત